Tiranë, 28 shtator NOA - Tentativat e dështuara për të detyruar motrën e tij të mos shkojë të jetojë me një burrë 15 vjet më të madh se ajo, ka detyruar një adoleshent të kërkojë ndihmën e policisë.
Artan S, 18-vjeç nga Tirana është paraqitur dje në polici ku ka denoncuar 36-vjeçarin A.S, lindur në Kukës dhe banues në Bathore.
Sipas adoleshentit, 36-vjeçari i ka marrë me forcë motrën V.S, 21-vjeçe dhe e mban në banesën e tij pa dëshirën e saj.
Burime nga policia thanë për agjencinë e lajmeve NOA se policia, menjëherë pas denoncimit të 18-vjeçarit nisi hetimet për të verifikuar rastin.
Oficerët e policisë kanë mundur të gjejnë banesën e 36-vjeçarit ku mbahej e reja.
Kjo e fundit është marrë në pyetje nga inspektorët, para të cilëve ka mohuar pretendimet e të vëllait.
Ajo ka dëshmuar se ishte larguar me dëshirën e saj nga banesa dhe se kishte dëshirë të jetonte në banesën e 36-vjeçarit.
Vajza ka mohuar pretendimet e mëtejshme të vëllait të saj, se po mbahej me forcë nga 36-vjeçari.
Pas deklaratës së 21-vjeçares, policia e ka lënë të lirë, atë ndërsa po të njëjtin veprim ka kryer edhe me 36-vjeçarin i cili ka hequr nga vetja çdo përgjegjësi që i kishte ngarkuar vëllai i vajzës.
k.k/NOA
