Prishtinë, 11 nëntor, NOA - Zgjedhjet lokale të 15 nëntorit kanë drejtuar në Prishtinë një delegacion ad hoc prej shtatë anëtarësh të Parlamentit Evropian.
I drejtuar nga eurodeputetja gjermane, Doris Pack, mësohet se ky delegacion do të qëndrojë në Kosovë me rastin e zgjedhjeve lokale të cilat do të mbahen më 15 nëntor.
Në fakt, delegacioni i PE-së nuk është i pajisur me mandatin e vëzhgimit të zgjedhjeve, por vetëm atë të kryerjes së vizitave në disa qendra votimi të Kosovës, duke përfshirë edhe disa prej komunave të sapoformuara.
Anëtarët e tij do të takohen edhe me përfaqësuesit e qeverisë, anëtarët e Komisionit Qendror të Zgjedhjeve dhe disa kandidatë për zgjedhje të Kosovës.
Nga ana e saj, europarlamentarja gjermane u ka bërë thirrje votuesve kosovarë që të marrin pjesë në këto zgjedhje, të cilat janë zgjedhjet e para që administrohen plotësisht nga institucionet e Kosovës. "Ne e mirëpresim përkushtimin e autoriteteve ndaj demokracisë dhe u bëjmë thirrje votuesve që të marrin pjesë në zgjedhjet lokale të së dielës", ka thënë Pack. n.e/NOA
