Korçë: Zgjerohet Bashkepunimi Mes Universiteteve Të Korçës Dhe Tetovës
KORÇË, 4 maj /ATSH-Behar Fejzulla/ - Universitetet "Fan Noli" në Korçë dhe ai i Tetovës do të thellojnë bashkëpunimin sipas një marrëveshjeje të veçantë, që parashikon shkëmbimin e eksperiencave në fushat e mësimdhënies, projekte të përbashkëta, etj.
Marrëveshja u firmos sot në Korçë nga rektorët Gjergji Mero për universitetin "Fan Noli" dhe Agron Reka për Universitetin Shtetëror të Tetovës.
Për rektorin e universitetit "Fan Noli", Gjergji Mero, marrveshja synon të lehtësojë dhe të promovojë shkëmbime në fushat e mësimdhënies dhe kërkimit shkencor për çështje në interes dhe që kanë të përbashkët gjuhën dhe qëllimin edukativ.
Agron Reka, rektor i Universitetit të Tetovës, tha se "fushat e bashkëpunimit dhe shkëmbimi i përvojës do të përfshijnë fushat e mësimdhënies, teksteve, botimet shkencore si dhe projekte të përbashkëta në kuadrin e bashkëpunimit ndërkombëtar".
Në marrëveshje janë parashikuar bashkëpunime edhe në shkëmbimin e teksteve, programeve dhe pedagogëve në mësuesi, administrim-biznes, bujqësi, financë-turizëm, marketing-manaxhim dhe infiermeri.
Palët ranë dakort që t'i kushtojnë vëmendje të veçantë zbatimit të projekteve të përbashkëta ndërkufitare, që financohen nga Bashkimi Evropian./ch/
