Anëtarët E Rinj Të Gjykatës Kushtetuese Betohen Para Presidentit Të Republikës
TIRANË, 25 Maj/ATSH/.- Anëtarët e rinj të Gjykatës Kushtetuese, Altina Xhoxhaj dhe Bashkim Dedja bënë sot betimin para Presidentit të Republikës, Bamir Topi në një ceremoni zyrtare në selinë e Presidencës.
Sipas njoftimit për shtyp të Presidencës, pas ekzekutimit të himnit kombëtar dhe leximit të formulës së betimit nga Sekretari i Përgjithshëm, Aleksandër Flloko, me dorën mbi Kushtetutë anëtarët e rinj bënë betimin para Kryetarit të Shtetit, i cili nga ana e tij i dorëzoi dekretin e emërimit dhe u uroi suksese në përmbushjen e misionit të tyre në këtë funksion të lartë e me përgjegjësi në sistemin e drejtësisë.
Më 20 maj Kuvendi miratoi dekretet e Presidentit të Republikës për emërimin e Altina Xhoxhaj dhe Bashkim Dedes në detyrën e anëtarit të Gjykatës Kushtetuese, ndërsa rrëzoi dekretin e emërimit të Vangjel Kostës./a.s//n.m/
