Tiranë, 11 prill, NOA – Partia Demokratike ka reaguar sot për deklaratat që kryetari i Partisë Socialiste, Edi Rama bërë dje në Kombinat, për përdorimin e një helikopteri nga Kryeministri Sali Berisha në fushatë.
“Dje ai akuzoi Kryeministrin e vendit se po përdor mjete fluturuese në fushatën e tij. Me sa duket, zotit Rama, ngaqë zvarritet vetë, i duket sikur të tjerët fluturojnë.
Partia Demokratike ju informon se Kryetari i saj dhe njëkohësisht Kryeministri i vendit, në asnjë rast apo rrethanë nuk ka përdorur helikopterë privatë apo shtetërorë që nga hapja e fushatës”, tha zëdhënësja e Partisë Demokratike, Albana Mustafaraj.
Ajo shtoi se kjo është një akuzë e pavërtetë, që synon dëmtimin e fushatës intensive dhe takimeve entuziaste të Kryeministrit dhe Kryetarit të PD-së,Berisha.
“Padyshim arsyeja e kësaj akuze të pavërtetë qëndron në axhendën intensive të takimeve entuziaste të Kryeministrit dhe Kryetarit të PD-së,z. Berisha, pas së cilës nuk qëndrojnë as helikopterë, as qilimë fluturues, por frymëzimi nga qytetarët dhe pritja e tyre, pasioni elektoral, energjitë dhe disiplina e hekurt e Kryetarit të Partisë Demokratike, që po konturojnë një fitore të bukur e të thellë më 8 maj në Tiranë dhe në mbarë Shqipërinë të të gjithë kandidatëve të “Aleancës për Qytetarin””, tha Mustafaraj.
Ajo shtoi se “nën panikun e dështimit të fushatës që ç’do ditë po i bie tavani, Kryetari i PS-së Edi Rama, vazhdon si rrugë të vetme politikën e përbaltjes përmes shpifjes ndaj kundërshtarit”.
a.k.NOA
