Tiranë, 3 korrik 2011, NOA – Një ditë pas nënshkrimit të tri marrëveshjeve mes Kosovës dhe Serbisë si rezultat i bisedimeve teknike mes tyre të mbajtura në Bruksel, Ministria e Punëve të Jashtme të Shqipërisë ka përshëndetur arritjen e marrëveshjeve të para.
Deklarata për shtyp e kryediploamatit Edmond Haxhinasto është i pari reagim publik autoriteteve të Tiranës zyrtare sa i përket nënshkrimit të tri marrëveshjeve për çështje të dobishme mes Serbisë dhe Kosovës, si ajo për regjistrat civilë, diplomat dhe lëvizjen e lirë.
Ministri Haxhinasto deklaron se arritja e marrëveshjeve të para në bisedimet teknike Kosovë-Serbi bazohet mbi parimet e reciprocitetit mes dy shteteve të pavarura e sovrane dhe vullnetit të mirë për të bashkëpunuar në zgjidhjen e çështjeve praktike mes tyre.
“Marrëveshjet për lëvizjen e lirë, njohjen reciproke të diplomave dhe regjistrat civilë, janë në përputhje me frymën e bashkëpunimit dhe integrimit europian të rajonit dhe i afrojnë këto dy vende e gjithë rajonin më afër me BE-në”, thuhet në komunikatën e MPJ-së.
Kreu i diplomacisë shqiptare shpreh më tej besimin se marrëveshjet e arritura do të fillojnë të zbatohen sa më shpejt.
Në fund të deklaratës, kryediplomati Haxhinasto përshëndet angazhimin e përbashkët të BE-së dhe SHBA-ve, që mundësuan arritjen e marrëveshjeve të dobishme për qytetarët e Kosovës dhe Serbisë.
mit/NOA
