Bolzano, 4 shtator 2011, NOA/ Albana Qehajaj - Një 30 vjeçar shqiptar ka gjetur vdekjen i shtypur nga treni. Agjencitë italiane të lajmeve bëjnë me dije se ngjarja ka ndodhur në periferi të Bolzanos. Mbrëmjen e kaluar, pak para mesnate, 30 vjeçari, identiteti i të cilit nuk bëhet ende i ditur e që banonte në Bressanone është goditur nga një tren mallrash pranë stacionit hekurudhor në Val d’Isarko.
Drejtuesi i trenit, që udhëtonte drejt veriut mundi të dallojë që, i riu po qëndronte mbi binarë, por nuk ka mundur dot të ndalojë trenin në kohën e duhur. Kjo ka sjellë vdekjen e menjëhershme të 30 vjeçarit me origjinë shqiptare.
Policia e hekurudhave ka përjashtuar mundësinë e një vetëvresje, ndërsa linja hekurudhore është bllokuar për afro 2 orë.
a.q/NOA
